ŠPORT.sk Қазақстан құрамасының Фарер аралдарына қарсы ойынын бағалады
Словакиялық ŠPORT.sk сайты Ұлттар лигасында Фарер аралдарына қарсы өз алаңында 2:2 есебімен тең түскен Қазақстан құрамасының ойынына баға берді, деп хабарлайды Pin-UpSport.kz.
Басылым Қазақстан құрамасының допқа иелік етудегі басымдығы бірінші таймда сенімді ойын көрсетуге жеткіліксіз болғанын атап өтті. «Қазақстан допқа көбірек иелік етті, бірақ комбинациялық ойыны жүйесіз көрінді, ал қорғанысы сыр берді. Тайм соңында қазақстандықтар байқала бастаған қысымды да тиімді пайдалана алмады. Үзіліске командалар алаң иелерінің қақпасына гол соққан қонақтардың пайдасына 0:1 есебімен кетті. Фарер аралдарының тактикалық әрекеттері мен қарсы шабуылдағы қаупі алаң иелеріне қарсы тиімді болды», – деп жазды сайт.
Сонымен қатар ŠPORT.sk екінші таймда Қазақстан құрамасының шабуылда белсенділігін арттырғанын атап өтті. «Екінші тайм Қазақстан құрамасындағы ауыс-түйістерден және алаң иелерінің шабуылдағы белсенділігінің айтарлықтай артуынан басталды. 54-минутта Самородовтың стандарттан жасаған өткір добы Ламхауге қақпасының маңдайшасына тиді. Алаң иелері ұзақ уақыт қысым жасағанымен, 63-минутта өз қақпасының алдында күтпеген соққыға тап болды. Малый допты сәтсіз шығарып, оны Геза Туриға беріп қойды. Ол техникалық шеберлікпен допты әуеден соғып, алыс тоғыздыққа дәл бағыттап, Фарер аралдарының басымдығын 2:0-ге жеткізді», – делінген мақалада.
Мартин Агнарссон алаңнан қуылғаннан кейін Қазақстан құрамасы сан басымдығын пайдаланып, есепті теңестірді. «Бұрылыс екі минуттан кейін болды. Мартин Агнарссон Самородовты қажетсіз тартып қалғаны үшін екінші сары қағазын алып, алаңнан қуылды. Қазақстан сан басымдығын бірден пайдаланды. 68-минутта Сергей Малый допқа бірінші жетіп, жерге тиген соққысымен есеп айырмасын қысқартты – 1:2. Алаң иелері қысымды күшейтіп, қонақтарды айып алаңына қарай ығыстырды. 76-минутта есеп теңесті. Самородов допты қақпа алдына асырды, қақпашы Ламхауге допқа шығуда қателесті, ал Нұралы Әліп әуедегі күресте жеңіп, есепті 2:2-ге жеткізді», – деп жазды ŠPORT.sk.
Төрт турдан кейін Қазақстан С3 тобында екі ұпаймен соңғы орында тұр. Қараша айында команда сырт алаңда Молдовамен кездесіп, кейін өз алаңында Словакияны қабылдайды.
