Коко Гауфф Елена Рыбакинамен болатын жартылай финал туралы айтты
WTA рейтингінде төртінші орында тұрған Коко Гауфф US Open-2026 турнирінің жартылай финалында Елена Рыбакинамен өтетін кездесуге қатысты ойын білдірді, деп хабарлайды Pin-UpSport.kz. Америкалық теннисші қазақстандық спортшының қазіргі ойын деңгейіне жоғары баға берді.
Гауфф Рыбакинаны әлемдік рейтингте бірінші орынға көтерілуімен құттықтап, Еленаның қазіргі таңда өте жақсы теннис көрсетіп жүргенін атап өтті. Америкалықтың айтуынша, алдағы кездесуде ол қарсыласының мықты тұстарын ескеріп, соңына дейін күресуге тырысады.
«Елена қазір керемет теннис көрсетіп жүр. Оның әлемнің бірінші ракеткасы атанғанын немесе жақын арада сол мәртебеге ие болатынын құттықтаймын. Бұл шынымен де керемет жетістік. Біз Торонто қаласында ойнаған едік, ол кезде мен өз ойынымды жақсы көрсете алмадым. Сондықтан сол кездесуден сабақ алып, алдағы матчта соны ескеруім керек. Оның бірнеше эйс жасап, бірнеше виннер соғатынын білемін. Бірақ мен күресуді жалғастырып, бар күшімді саламын. Қолымнан келетіні де осы», – деді Гауфф.
Рыбакина мен Гауфф осыған дейін екі рет кездесіп, әрқайсысы бір-бір реттен жеңіске жеткен. 2022 жылы Торонто қаласындағы турнирде америкалық теннисші басым түссе, 2026 жылдың тамызында Елена сол жарыстың жартылай финалында қарымта қайтарды. Қазақстандық спортшы US Open ширек финалында Қытай өкілі Чжэн Циньвэньді 3:6, 6:1, 6:4 есебімен жеңіп, жартылай финалға өтті.
Бұл нәтиже Рыбакинаға WTA рейтингінде бірінші орынға шығуға мүмкіндік берді. Осылайша Елена Қазақстан тарихындағы әлемнің бірінші ракеткасы атанған алғашқы теннисші болады. Сонымен бірге ол WTA тарихында рейтинг көшін бастаған 30-шы спортшы атанады. Гауфф пен Рыбакина арасындағы матчтың жеңімпазы финалда Арина Соболенко немесе Джессика Пегуламен ойнайды.
