«Ордабасы» АПЛ-де ойнаған футболшыға қызығушылық танытты
Фото: Sport Arena
Шымкенттің «Ордабасы» клубы ағылшын жартылай қорғаушысы Джесси Лингардтың трансфер мүмкіндігін қарастырған, деп хабарлайды Pin-UpSport.kz. Клуб басшылығы ойыншының өкілдерімен байланысқа шығып, оның Қазақстанға келуі үшін қандай қаржылық талаптар бар екенін білген.
Дегенмен, бұл қызығушылық нақты келіссөз деңгейіне жетпеген. 2023 жылғы ел чемпионы тек жағдайды барлап, қаржылық шарттарын сұрастырған. Мәліметке қарағанда, 33 жастағы футболшы Қазақстанға келуге қарсы болмаған, бірақ оның талап еткен жалақысы шамамен 900 000 еуро болған.
Лингард көпшілікке «Манчестер Юнайтедтегі» ойынымен жақсы таныс. Ол Англия құрамасында да өнер көрсетіп, 32 матч өткізген. Еуропалық турнирлерде де, ұлттық құрама сапында да тәжірибесі бар ойыншы.
Алайда трансфер жүзеге аспады. Шетелдік ақпарат көздерінің хабарлауынша, Лингард қазір бразилиялық «Коринтианс» клубымен келісімшартқа отырып, мансабын Бразилияда жалғастыруды таңдаған.
